फुटबलर भ्यान डर भार्टले लिए सन्यास

एजेन्सी ।
रियल मड्रिड तथा टोटनह्यामका पूर्व मिडफिल्डर राफेल भ्यान डर भार्टले सन्यास लिएका छन् ।
सन् २०१० को विश्वकपमा नेदरल्याण्ड्स उपविजेता बन्दा टोलीमा रहेका भ्यान डर भार्टले १८ वर्षे खेलाडी करियरबाट आराम लिने निर्णय गरेका हुन् ।
३५ वर्षीय भार्टले १७ वर्षको उमेरमा घरेलु क्लब आयाक्सबाट ब्यवसायिक फुटबल करियर सुरु गरेका थिए । पाँच वर्षे आयाक्स करियरमा उनले ११७ खेलमा ५२ गोल गर्दै नेदरल्याण्ड्सको शीर्ष डिभिजन लिग दुई पटक जिताएका थिए ।
त्यसपछि तीन वर्ष जर्मनीको ह्याम्बर्गरमा बिताएका उनले ७४ खेलमा ३० गोल गरेका थिए । त्यसपछि दुई वर्ष स्पेनिस क्लब रियल मड्रिडमा उनले ५८ खेलमा ११ गोल गरेपछि उनी इंग्लिस क्लब टोटनह्याम पुगेका थिए । जहाँ उनल ६३ खेलमा २४ गोल गरे ।
यसै वर्ष डेनमार्कको इस्बर्ग फुटबल क्लबमा आवद्ध भएका भार्टले इन्ज्युरीका कारण तीन खेलभन्दा बढी खेल्न पाएनन् । ‘सबैभन्दा माया गरेको कुराबाट विदा लिने निर्णय निकै कठीन थियो, ’ ट्वीट गर्दै उनले लेखेका छन् ।