बर्दियामा मध्यराति भैंसी व्यापारीको हत्या, चार जना पक्राउ

काठमाडौं ।
बर्दियाको बढैयाताल गाउँपालिका–३ गोबरियापुरका भैंसी व्यापारी ३५ वर्षीय मोहन खटिकको गएराति हत्या भएको छ । मध्यराति १ बजे उनको गोली प्रहार गरी हत्या गरिएको बढैयाताल–३ का वडाध्यक्ष दुर्गावप्रसाद पराजुलीले जानकारी दिनुभयो ।
कोखमा गोली प्रहारको चोट जस्तो देखिए पनि कोठामा रगत नदेखिएकोले अहिले नै गोली प्रहार भन्न नमिल्ने बर्दियाका एसपी सुरेन्द्रप्रसाद मैनालीले जानकारी दिनुभयो ।
गोली प्रहारबाट गम्भीर घाइते उनलाई उपचारका लागि नेपालगञ्ज लैजादै गर्दा बाटोमै मृत्यु भएको प्रहरीले जनाएको छ । सामान्य परिवारका खटिक भैसी व्यापारको काम गर्ने गरेको वडाध्यक्षको भनाइ छ ।
दुई जनाको समूहमा आएका व्यक्तिले गोली प्रहार गरेको परिवारले बताएपछि प्रहरीले गोली प्रहार गर्नेको व्यापक खोजी गरेको जनाएको छ ।
घटना भएको थाहा पाउनासाथ प्रहरीले नेपालगन्जबाट तालिमप्राप्त कुकुर मगाएर स्न्याफिङ गराइसकेको छ । कुकुरले झन्डै डेढ किलोमिटरसम्म गएर केही संकेत गरेको एसपी मैनालीले जानकारी दिनुभयो ।
कुकुरले दिएको संकेत र प्रहरीको अनुस्न्धानबाट शंकास्पद देखिएका ४ जनालाई नियन्त्रणमा लिएको एसपी मैनालीले बताउनुभयो ।