५ वर्ष मुनिकालाई भिटामिन ए र जुकाको औषधि खुवाइँदै

 कपिलवस्तु ।

देशभर सहित कपिलवस्तुमा पनि आज र भोली बालबालिकालाई भिटामिन ए र जुकाको औषधि खुवाइँदै छ । ६ महिनादेखि ५ वर्षसम्मका बालबालिकालाई भिटामिन एको क्याप्सुल र एक वर्षदेखि ५ वर्षसम्मका बालबालिकालाई जुकाको औषधि खुवाइने स्वास्थ्य मन्त्रालयले जनाएको छ ।

भिटामिन ए र जुकाको औषधिसँगै ५ वर्ष मुनिका बालबालिकाको पोषणको अवस्था थाहा पाउन पाखुराको पनि नाप लिइनेछ ।

मन्त्रालयले नजिकैको स्वास्थ्य संस्था या वितरण केन्द्रमा आफूलाई पायकपर्ने समयमा बालबालिकालाई भिटामिन ए र जुकाको औषधि खवाउन लैजान आग्रह गरेको छ ।

यो अभियानका क्रममा बालबालिकाको पोषणका लागि बालभिटा पनि वितरण गरिने स्वास्थ्य मन्त्रालयले जनाएको छ । यता कपिलवस्तुका १० ओटै स्थानीय तहमा रहेका स्वास्थ्य शाखाले पनि भिटामिन ए र जुकाको औषधि खुवाउदैछन । नजिकको स्थानीय तहमा रहेका स्वास्थ्य संस्थामा गएर बालबालिकालाई औषधि खुवाउन स्वास्थ्यकर्मीले आग्रह गरेका छन ।