कृष्णनगरमा लगाइएको कर्फु साँझ सम्मका लागि हट्यो, ५ बजे पछि अर्को निर्णय हुने

मायादेवी अनलाइन, कृष्णनगर ।
जिल्ला प्रशासन कार्यालय कपिलवस्तुले कृष्णनगर बजार क्षेत्रमा आज दिउँसो १२ बजे सम्मको लागि हटाएको कर्फुको समयसिमा पुन थप गरेको छ । प्रमुख जिल्ला अधिकारी अर्जुन प्रसाद पोख्रेलका अनुसार कृष्णनगर बजार क्षेत्रमा साँझ ५ बजे सम्म कर्फु हटाइएको छ ।
आइतबार साँझ ५ बजेदेखि लगाएको कर्फू प्रशासन कार्यालयले आज विहान ८ बजे देखि १२ बजे सम्म हटाएको थियो । कृष्णनगरको जनजीवन सामान्य बन्दै गएको भन्दै साँझ ५ बजे सम्मका लागि कर्फु हटाएको प्रमुख जिल्ला अधिकारी पोख्रेलले बताउनुभयो । साँझ ५ बजे पछि त्यहाँको अवस्था हेरेर कर्फुको बारेमा हेर विचार गर्न सकिने उहाले बताउनुभयो ।
स्थानीय हिन्दु समुदाय र मुस्लिम समुदाय बीच विवाद बढे पछि जिल्ला प्रशासन कार्यालयले कर्फु लगाएको थियो । कर्फु हटेपछि भारतीय सिमावर्ती कृष्णनगरको जनजीवन सामान्य बन्दै गएको छ । शनिबार देखि बढेको विवाद आज देखि सामान्य बनेको हो । गएराती कडा सुरक्षाका बीच दुर्गा पूजाको मूर्ती विसर्जन गरिएको थियो । दशैको भोलीपल्ट एकादशी तिथीमा दुर्गा पूजाको मूर्ती विसर्जन गरिदै आए पनि यसबर्ष विवाद भएपछि दशैको पर्सिपल्ट द्धादसी तिथीमा मूर्ती विसर्जन गरिएको हो ।
कृष्णनगर बजार क्षेत्रमा बडादशैको भोली पल्ट दुर्गा पुजाको मूर्ति विसर्जन गर्ने कार्यमा स्थानीय हिन्दु र मुस्लिम समुदायबीच विवाद समाधान नभएपछि कृष्णनगर क्षेत्रमा कर्फु लगाएको हो । मूर्ती विसर्जन गर्न जाने बाटोको विषयमा दुई समुदाय बीच झगडा भएको थियो ।
प्रशासनले कृष्णनगर बजारको दक्षिण क्षेत्र नेपाल भारत दशगजा, उत्तर तर्फ कृष्णनगर १ शिवानगरको बढाया पोखरी क्षेत्र, पूर्व सेमरा गाँउ र पश्चिम सिर्सिहवा चोकसम्म कर्फु लगाउने निर्णय गरेको थियो ।