मन्त्री बरालले किन दिए जनप्रतिनिधिको तलबभत्ता रोक्का गर्ने सम्मको चेतावनी !

मायादेवी अनलाइन, कपिलवस्तु ।
प्रदेश ५ का सामाजिक विकास मन्त्री सुर्दशन बरालले काम नगर्ने जनप्रतिनिधिको तलब भत्ता रोक्का गर्ने चेतावनी दिनुभएको छ । प्रदेशलाई साक्षर बनाउने अभियानमा प्रदेश सरकार लागेको भन्दै मन्त्री बरालले यसै आर्थिक बर्ष भित्र काम सक्न उहाले जनप्रतिनिधिलाई आग्रह गर्नुभयो । कपिलवस्तुको बुद्धभूमि नगरपालिकाको साक्षर घोषणा कार्यक्रममा बोल्दै मन्त्री बरालले यस्तो बताउनुभएकोे हो ।
उहाले स्थानीय तहका जनप्रतिनिधिलाई साक्षर, खुल्ला दिशा मुक्त र पूर्ण भर्ना घोषणा गर्न आग्रह गर्नुभयो । यदी तोकिएको समयमा काम नगरे सरकारले दिने तलबभत्ता रोक्ने उहाले चेतावनी दिनुभयो । प्रदेश सरकारले यस बारेमा निर्णय गरिसकेको उहाले बताउनुभयो ।
कार्यक्रममा प्रदेशका सामाजिक विकास समितिका सभापति तथा सांसद दीर्घनारायण पाडेले शिक्षाको विकास बिना समृद्धि आउन नसक्ने बताउनुभयो । साक्षर घोषणा भए पनि यसलाई पूर्ण कार्यान्वयन गर्न सके बल्ल अभियानले सार्थकता पाउने उहाले बताउनुभयो ।
प्रदेश सांसद माला गोतामेले बुद्धभूमि साक्षर घोषणा हुनु राम्रो कुरा भएको बताउनुभयो । यसैगरी अरु स्थानीय तहले पनि अभियानलाई सार्थकता दिनुपर्ने जिकिर गर्नुभयो ।
नगरपालिकालाई साक्षर घोषणा गर्दै नगरप्रमुख केशव कुमार श्रेष्ठले कार्यपत्र प्रस्तुत गर्नुभएको थियो । नगरका १० ओटै वडालाई साक्षर घोषणा गर्दै सिंगो नगरलाई साक्षर बनाएको उहाले बताउनुभयो । अभियानलाई निरन्तर रुपमा जारी राख्ने प्रतिबद्धता गर्नुभयो ।
कार्यक्रममा शिक्षा विकास तथा समन्यव ईकाई कपिलवस्तुका प्रमुख बाबुराम भट्टराई, नयाँ शक्तीका नेता इन्द्रमणी पौडेल, नेकपाका नेता पिताम्बर खनाल, भृकृटी माविका विद्यालय व्यवस्थापन समितिका अध्यक्ष रुद्रलाल बजाडे, राम प्रसाद अर्याल, आस्था घिमिरे लगायतले बोल्नुभएको थियो ।
नगरपालिकाका प्रमुख प्रशासकीय अधिकृत मेघनाथ पाध्याको स्वागत मन्तव्यमा भएको कार्यक्रममा विभिन्न समूहले बजागाजा र झाकि प्रर्दशन गरेका थिए । कार्यक्रमको संचालन स्रोत व्यक्ति खेमराज पौडेलले गर्नुभएको थियो ।