तीव्र गतिमा रहेको मोटरसाइकलले मान्छे ठोक्दै हिडेपछि…

मायादेवी अनलाइन, कपिलवस्तु ।
कपिलवस्तुको वाणगंगा १० बरवामा बुधबार भएको सवारी दुर्घटनाबाट ४ जना घाइते भएका छन । पिपरा चाकरचौडा सडकखण्ड अन्तरगत उक्त दुर्घटना भएको हो । दक्षिणबाट उत्तर तर्फ आउँदै गरेको लु ११ प ५५५२ नं. कोे मोटरसाइकलको ठक्करबाट बरवा निवासी १० बर्षिय सौगात खनाल घाइते भएका छन । उनी पैदल हिडिरहेको बेला मोटरसाइकलले ठक्कर दिएर घाइते बनाएको प्रहरीले जनाएको छ ।
तीव्र गतिमा रहेको मोटरसाइकलले खनाललाई ठक्कर दिएपछि उत्तरबाट दक्षिण तर्फ आइरहेको मोटरसाइकललाई ठक्कर दिन पुगेको थियो । जसबाट यु पी ५५ एच ७०७९ नम्बरको मोटरसाइकलमा सवार भारत घर भएका ६५ बर्षिय रुस्तम अलि घाइते भएका छन । यस्तै बालक र मोटरसाइकलाई ठक्कर दिएर घाइते बनाउने मोटरसाइकलमा सवार दुई जना पनि घाइते भएको इलाका प्रहरी कार्यालय पिपराले जनाएको छ ।
घाइते हुनेहरुमा वाणगंगा ११ निवासी १९ बर्षिय होमनारायण थारु र १५ बर्षिय अजय थारु रहेको छन । यो मोटरसाइकलमा तीन जना सवार थिए । ठक्कर दिने मोटरसाइकल र ठक्कर खाने मोटरसाइकलका दुवै चालक भने सकुशल रहेको प्रहरीले जनाएको छ । यि दुवै चालक प्रहरीको नियन्त्रणमा रहेको बताइएको छ । घाइते ४ जनाको बुटबलमा उपचार भैरहेको बताइएको छ ।