अज्ञात समूहद्वारा ९ नं. वडा कार्यालयमा आगजनी

गणेश बेल्बासे, अर्घाखाँची ।
शितगंगा नगरपालिका वडा नं.९ लामिदमार स्थित वडा कार्यालयमा शनिबार राती अज्ञात समुहद्धारा आगजनी भएको छ । करिब राती ११.४५ वजे रातीको समयमा अज्ञात समुहले आगजनी गरेको वडा सदस्य खुम बहादुर लुईचेले बताएका छन् ।
स्थानियका अनुसार तिन जनाको अज्ञात समूह आएको बताए छ्न् । त्यसको केही समयमै वडा कार्यालयमा आगजनी भएको बताईएको छ ।
आगजनीबाट कार्यालयका फर्निचर तथा महत्वपूर्ण कागजात जलेर नष्ट भएको कार्यालय सहयोगी सन्देश घर्तीले जानकारी दिनुभएको छ । कार्यालयको ढोकाको ताला फोडेर गरिएको आगजनीबाट कार्यालयको प्रशासन कोठाको साथै नजिकै रहेको स्वास्थ्य इकाईमा समेत क्षती पुगेको स्वास्थ्य इकाईका इन्चार्ज ओमलाल वलीले जानकारी दिनुभयो ।
आगजनी क्षेत्र तर्फ स्थानिय निकायका साथै प्रहरी पुगेर थप अनुसन्धान भईरहेको बताईएको छ ।
आगजनीमा संलग्नको खोजी भईरहेको ईलाका प्रहरी कार्यालय ठाडाका असाई प्रदिप कुँवरले बताए । आगलागिमा विप्लब समुहको संलग्नता रहेको अनुमान गरिएको भए पनि विप्लव समुहले अहिले सम्म कुनै प्रकारको जिम्मा लिएको छैन ।