बालक अपहरणको प्रयास गर्ने एकजना पक्राउ

मायादेवी अनलाइन, कपिलवस्तु ।
जिल्लाको बुद्धभूमि नगरपालिका वडा नं. १० गगनी गाउँमा २ वर्षीय बालक अपरहण गर्न खोजेको भन्दै स्थानीयले एक जनालाई पक्राउ गरी प्रहरीलाई बुझाएका छन् । मध्य रातमा बालक पक्राउ गर्न खोजेको आरोपमा नवलपरासी रामग्राम नगरपालिका वडा नम्बर १ का सुवास हरिजनलाई स्थानीयले नियन्त्रणमा लिएका हुन ।
स्थानीय राम औतार पासीको २ वर्षीय बालकलाई गाउँबाट जबरजस्ती बोकेर जैजाँदै गर्दा स्थानीयले पक्राउ गरेको बताएका छन् । उनलाई गाउँमै बाँधेर राखी स्थानीयले प्रहरीलाई खबर गरेका थिए ।
गाउँलेको खबरबाट जिल्ला प्रहरी कार्यालय तौलिहवा र ईलाका प्रहरी कार्यालय गोरुसिंगेबाट गएको प्रहरी टोलीले हरिजनलाई पक्राउ गरी ईलाका प्रहरी कार्यालय गोरुसिंगेमा थुनामा राखेको छ ।
बालकलाई बली दिन अपहरण गरी लैजान लागिएको गाउँलेको आशंका छ । पक्राउ परेका हरिजन उपर थप अनुसन्धान भई रहेको प्रहरी नायब उपरीक्षक नरेन्द्र कार्कीले बताउनुभयो ।