प्रदेश सरकारले भोली जगदिशपुरमा जैविक विविधता दिवस मनाउँने, तयारी तिव्र

मायादेवी अनलाइन, कपिलवस्तु ।
कपिलवस्तुको जगदिशपुर तालमा २५ औं अन्तराष्ट्रिय जैविक विविधता दिवस मनाउने तयारी वैठक आइतबार जगदिशपुरमा सम्पन्न भएको छ । उद्योग, पर्यटन, बन तथा वातावरण मन्त्रालय प्रदेश नम्बर ५ आउदो जेठ ८ गते २५ औं अन्तराष्ट्रिय जैविक विविधता दिवस जगदिशपुरमा भब्य रुपमा मनाउने तयारी गरेको जानकारी दिएको हो । उक्त कार्यक्रमलाई विशेष महत्व दिएर प्रदेश नम्बर ५ का मुख्यमन्त्री शंकर पोख्रेल आउनुहुने भएको छ ।
उद्योग, पर्यटन, बन तथा बातावरण मन्त्रालयका सचिव सूर्यकान्त सिग्देलको अध्यक्षतामा बसेको सरोकारवालासंगको वैठकमा जगदिशपुर तालमा जैविक विविधता दिवस मनाएर यसको महत्वलाई अझ बढावा दिनुपर्ने र यसको प्रचार प्रसार गर्न जरुरी रहेको बताइएको थियो । मन्त्रालयका सचिव सिग्देलले जगदिशपुर ताल संरक्षणमा प्रदेश सरकारले प्राथमिकता दिएको बताउदै जगदिशपुरलाई पर्यटकीय गन्तब्य बनाउने गरी योजना निर्माण गर्न स्थानीय तथा सरोकारवालाई आग्रह गर्नुभयो ।
जगदिशपुर तालको जैविक विविधतालाई संरक्षण गरेर प्रदेश नम्बर ५ कै प्रमुख पर्यटकीय गन्तब्य बन्ने सम्भावना बोकेको जगदिशपुरलाई स्थानीय र प्रदेश सरकारले दिर्घकालिन योजना बनाउनु पर्ने स्पष्ट पार्नुभयो ।
जैविक विविधता दिवस भब्य रुपमा बनाउन जगदिशपुर जलाशय व्यवस्थापन बहुसरोकार मञ्च, कपिलवस्तु नगरपालिका, शिक्षा विकास तथा समन्वय इकाई, जिल्ला बन कार्यालय, वाणगंगा सिंचाई आयोजना, बर्ड कन्जरभेसन नेपाल, नेपाल पत्रकार महासंघ कपिलवस्तु लगाएतले आआफनो क्षेत्रबाट सघाउने प्रतिवद्धता व्यक्त गरेका छन् ।
कार्यक्रममा जगदिशपुर जलाशय बहुसरोकार मंचका सदस्य अब्दुल रसिद खाँले ताललाई सिंचाई सुविधा संगसंगै पर्यटकीय रुपमा विकास गर्नुपर्ने बताएका थिए । जैविक विविधता दिवसका अवसरमा जगदिशपुर तालको इतिहास बारे जानकारी, स्थानीय सँस्कृति झल्कने झाँकी प्रस्तुती, निवन्ध प्रतियोगिता, विभिन्न प्रजातीका दुर्लभ चराहरुको डिस्प्ले, बर्ड वाचिङ लगाएतका कार्यक्रम आयोजना गर्ने तयारी भएको मन्त्रालयले जनाएको छ ।