अज्ञात समूहद्वारा जेसीबीमा आगजनी, जेसीबी पूर्णरुपमा ध्वस्त

सीताराम चौधरी, कपिलवस्तु ।
अज्ञात समूहले कपिलवस्तुमा एक जेसीबीमा आगजनी गरेका छन् । जिल्लाको विजयनगर गाउँपालिका १, जवाबैराठमा काठ लोड गर्दै गरेको रा १ क ५६९ नम्बरको जेसीबीमा १५÷१६ जनाको अपरिचित समूहले जे.सी.बी.मा आगो लगाएका हुन् । आगलागीबाट जे.सी.बी. पूर्ण रुपमा ध्वस्त बनेको छ ।
गौतमबुद्ध साझेदारी वन उपभोक्ता समूहको काठ ठेकेदार पक्षले जेसीबी प्रयोग गरी ट्रेक्टरमा लोड गर्ने बेला अज्ञात समूहले आगो लगाएको इलाका प्रहरी कार्यालय गणेशपुरका प्रहरी निरीक्षक खिमबहादुर घर्तीमगरले जानकारी दिए ।
जे.सी.बी.मा आगजनी गरेको खबर पाए लगत्तै प्रहरी निरीक्षक घर्तीमगर सहितको टोली घटनास्थल पुगेको थियो । त्यसैगरी घटनास्थलमा इलाका प्रहरी कार्यालय कृष्णनगरका प्रहरी निरीक्षक र इलाका प्रहरी कार्यालय बहादुरगञ्जका प्रहरी नायब निरीक्षकको टोली समेत पुगेको बताइएको छ ।
जे.सी.बी. दाङ जिल्ला शान्तिनगर १ का घनश्याम वुढाको रहेको बताइएको छ । घटनास्थल जिल्लाकै सबैभन्दा सुदूर पश्चिम जवाबैराठमा पर्ने प्रहरीले जनाएको छ ।