भलवाडका दुईजना महिला बेपत्ता, दुवैका पति विदेश, परिवारमा तनाब

चुरामणि अर्याल, कपिलवस्तु १९ पुस ।
कपिलवस्तु भलवाड एउटै वाडका दुई महिला बेपत्ता भएका छन् । वाणगंगा नगरपालिका वडा–९ भलवाडका दुई जना १४ दिनदेखि बेपत्ता भएका हुन् । बक्सीसपुर टोलमा घर भएकी २२ बर्षकी गीता गुरुङ्ग यही मंसिर २४ गतेदेखि बेपत्ता भएकी हुन् ।
भलवाड घर भएकी राधा नेपाली परियार पुष ५ गते देखी बेपत्ता भएको पारिवारीक स्रोतले बताएको छ । गीता गुरुङ्गको माईती अर्घाखाँची गौचौर हो । उनी मंसिर १५ गते साढे दुई बर्षको छोरालाई लिएर माइत गएको नन्द धना गुरुङले बताईन् ।
तीन दिन माइतमा बसेपछि उनी घर फर्कनको लागि बस चढेको माईती परिवारले बताएको छ । म घर आइपुगेँ भनेर आफूलाई समेत फोन गरेको गीताकी आमाले बताइन् ।
भाउजु किन घर आउनुभएन भन्दै नन्दले २४ दिनपछि गिताको माईतीमा फोन गर्दा मात्र उनी हराएको पुष्टि भएको हो । उनकी सासुले आँसु झार्दै भनिन्, “आफन्त भएका सबै ठाँउमा खोजियो, कतै पत्ता लगाउन सकिएन, नातिको सारै याद आउछ ।”
पुस ५ गतेदेखि बेपत्ता भएकी राधाको घटना भने फरक छ । ’मलाई कसैले नखोज्नुहोला’ भन्ने एक पेजको चिठी लेखेर उनी बेपत्ता भइन् । ’मैले हजुरहरु र हजुरको छोरालाई कहिल्यै खुसी दिन सक्ने छैन ।’ पत्रमा लेखिएको छ ।
राधा कहाँ गईन् भन्ने अहिले सम्मपत्ता लाग्न नसकेको उनका ससुरा छन्द बहादुर परियारले बताए । राधाले लेखेको पत्रमा कुनै ठाउँमा जान्छु भनेर स्पष्ट नलेखिएको परियारले बताए । सबै ठाउँमा खोजी गदर्जा पनि पत्ता लगाउन नसकिएको पारिवारीक स्रोतले बतायो ।
गिता गुरुङ्गका श्रीमान् नरेन्द्र मलेशियामा र राधाका श्रीमान् दीपक परियार ओमनमा हुनुहुन्छ । दुवै परिवारले ईलाका प्रहरी कार्यालयमा खोजिदिनका लागि निवेदन दिएको र खोजीकार्य भईरहेको प्रहरी निरिक्षक राजु कार्कीले जानकारी दिए ।