पश्चिम नवलपरासीमा बढ्यो चिनी तस्करी

बुटवल ।
पश्चिम नवलपरासीका भारतीय सीमा नाकाबाट चिनी तस्करी बढेको छ ।

विगत केही दिनदेखि तस्करी बढे पनि त्यसको नियन्त्रणमा भने प्रहरीले बेवास्ता गरेको गुनासो बढेको छ ।

सीमा क्षेत्रमा प्रहरीका युनिटहरू छन् । तर, तस्करीको चिनी भने सहज रुपमा भित्रिने गरेको हो ।

भन्सार छलेर भारतबाट ल्याइने चिनी दैनिक १० देखि १२ ट्रक नवलपरासी हुँदै चितवन, हेटौंडा, पोखरालगायतका प्रमुख शहरहरूमा पठाउने गरिएको स्रोतले जनाएको छ ।

रातको समयमा मात्र नभई दिउँसै पनि चिनीको तस्करी बढेको स्थानीय बताउँछन् । सीमा नाका हुँदै भित्रिने तस्करीको चिनीलाई पश्चिम नवलपरासी प्रहरीले बरामद गर्न वास्ता नगरेपछि ती चिनीहरू पूर्वी नवलपरासी प्रहरीले धमाधम बरामद गर्न थालेको हो । चिनी तस्करीबारे पश्चिम नवलपरासी प्रहरी बेखबर जस्तै बनेको छ ।

दुई साताको अवधिमा ५० टन तस्करीको चिनी बरामद गरी कार्यालयमा बुझाइएको महेशपुर भन्सार कार्यालयका नायब सुब्बा जीवन पन्थीले बताए । बरामद चिनीको सरकारी मूल्य प्रतिकिलो ६० रूपैयाँका दरले कुल ३० लाख कायम गरिएको छ ।

भन्सार कार्यालयमा बुझाइएका चिनीमध्ये तीन टन भन्सार कार्यालयका कर्मचारीले बरामद गरेका हुन् । बाँकी ४७ टन चिनी पूर्वी नवलपरासी प्रहरीले बरामद गरेर बुझाएको हो ।

पश्चिम नवलपरासी नाका हुँदै दुई वटा ट्रकमा गएको चिनीलाई पूर्वी नवलपरासी प्रहरीले गत जेठ २७ र असार ६ गते बरामद गरेर भन्सारमा बुझाएको थियो । तीव्र रुपमा भइरहेको तस्करीको यो समयमा पश्चिम नवलपरासी प्रहरीले भने चिनी बरामद गरेर बुझाएको रेकर्ड नरहेको भन्सार कार्यालयले जनाएको छ । भन्सार कार्यालयमा बरामद चिनीको विवरणअनुसार पनि पश्चिम नवलपरासीमा प्रहरीकै मिलेमतोमा चिनी तस्करी हुने गरेको बुझ्न गाह्रो छैन ।

सीमा क्षेत्रमा रहेका प्रहरी कार्यालयका इञ्चार्जहरूले जिल्लादेखि प्रदेश प्रहरीसम्म रकम बुझाउनुपर्ने भन्दै तस्करहरूसँग मोटो रकम लिएर चिनी तस्करी गर्न दिएको आरोप छ । पछिल्लो पटक चिनी तस्करी कार्य बढेपछि भन्सार कार्यालयले पनि छुट्टै कर्मचारी खटाएर गस्ती बढाएको भन्सार कार्यालयका नायब सुब्बा पन्थीले बताए ।

जिल्लाको भूजहवा, बसैया, झोलिनीपुर, गेर्मी, महेशपुरलगायतका नाकाबाट चिनी तस्करी बढेको हो । तस्करहरूले दसगजा नजिक चिनी ल्याएर राख्ने र त्यहाँबाट पिकअप भ्यानमा लोड गरी बर्दघाट, सेमरी र हरकट्टामा लगेर ट्रकमार्फत पठाउने गरेको स्रोतको दाबी छ ।

भारतमा प्रतिकिलो ५० रूपैयाँमा नेपालीमा पाइने चिनी नेपाल पुर्‍याएपछि ८० देखि ९० सम्म बिक्री हुने भएपछि चिनी तस्करी कार्य बढेको हो ।

जिल्ला प्रहरी कार्यालय पश्चिम नवलपरासीका उपरीक्षक (एसपी) ऋषिराम कँडेलले भने तस्करी रोक्न गस्ती गरिएको दाबी गरेका छन् । तस्करी बढेको गुनासो आएपछि सशस्त्र प्रहरीसँग मिलेर संयुक्त गस्ती थालिएको उनको भनाइ छ ।