मायादेवी अनलाइन, वाणगंगा ।
चन्द्रौटा क्षेत्रका युवा नेता अजय थापाले सोमबार औपचारिक रुपमा नेपाली कांग्रेस छाडेका छन् । आसन्न बैशाख ३० गते हुन गइरहेको स्थानीय तहको निर्वाचनमा कांग्रेसले टिकट नदिए पछि थापाले कांग्रेस परित्याग गरेका हुन् ।
कांग्रेस छाडे लगत्तै राप्रपामा प्रवेश गरेका उनले शिवराज नगरपालिकामा मेयरको टिकट पाएका छन् । दलबलसहित थापाले सोमबार राप्रपाबाट मेयर पदमा उम्मेद्वारी दिएका छन् ।
उप-मेयरमा भने राप्रपाबाट विपसा थारुले उम्मेद्वारी दिएकी छिन् ।
गएको स्थानीय तह ०७४ सालको निर्वाचनमा पनि थापा राप्रपाबाट मेयरमा चुनाव लडेका थिए । उनी पराजित भए लगत्तै मंसीरमा भएको संघ र प्रदेशको निर्वाचनमा थापा कांग्रेस प्रवेश गरि प्रदेश सभा सदस्यको टिकट पाएका थिए ।
वामगठन्धनको रुझानका बीच प्रदेश सांसदमा पनि पराजित बनेका थापा पछिल्लो समय कांग्रेसको राजनीतिमा सक्रिय थिए । तर, कांग्रेसले मेयरमा टिकट नदिए पछि थापाले फरक पार्टी रोजेका हुन् ।
शिवराजमा कांग्रेसले मेयरमा हुमाकान्त खनाल र उप-मेयरमा शारदा रायमाझीलाई उठाएको छ ।
प्रतिक्रिया