एकीकृत समाजवादीले कपिलवस्तुका ४ पालिकामा खोल्यो कार्यालय

मायादेवी अनलाइन, वाणगंगा ।
नेकपा (एकीकृत समाजवादी) कपिलवस्तुले ४ पालिकामा पार्टी कार्यालय स्थापना गरेको छ । समाजवादीको राम्रो उपस्थित रहेको ४ पालिकामा स्थानीय पार्टी कमिटीले पार्टी कार्यालय स्थापना गरेका हुन् ।

जसमा जिल्लाको दक्षिणी क्षेत्रमा रहेको शुद्धोधन गाउँपालिकाको लवनीमा गाउँपालिका कमिटीले कार्यालय खोलेको पार्टीका जिल्ला उपाध्यक्ष नेत्रलाल खनालले जानकारी दिनुभयो । आसन्न निर्वाचन लक्षित गतिविधिलाई व्यवस्थित पार्न कार्यालय सञ्चालनमा ल्याएर काम अगाडी बढाइएको उपाध्यक्ष खनालले जनाउनुभयो ।

एमाले विभाजन पश्चात शुद्धोधनका प्रभावशाली नेताहरु एकीकृत समाजवादी तिर लागेका थिए । यसले गर्दा यहाँ समाजवादीको बलियो उपस्थिति रहेको छ । पालिकाका ६ वटै वडामा वडा कमिटी गठन भएको शुद्धोधनमा एक्लै चुनाव लड्ने हैसियतमा पार्टी पुगेको खनालको भनाई छ । चैत्र २२ गते चन्द्रौटाका लागि आउनुभएका पार्टी अध्यक्ष तथा पूर्व प्रधानमन्त्री माधवकुमार नेपालले कार्यालयको औपचारिक उद्घाटन गर्नुभएको थियो ।

यस्तै शुद्धोधनसंग जोडिएको मायादेवी गाउँपालिकामा पनि एकीकृत समाजवादीले कार्यालय स्थापना भएको छ । समाजवादीका लुम्बिनी प्रदेश अध्यक्ष तथा प्रतिनिधिसभा सदस्य मेटमणी चौधरीको उपस्थितिमा चैत्र दोस्रो हप्ता पकडीमा पार्टी कार्यालयको उद्घाटन गरिएको पार्टीका जिल्ला सचिवालय सदस्य फैजल खानले जानकारी दिनुभयो । चुनाव जित्ने गरि गतिविधिलाई तीव्र पारेको पार्टीले कार्यालयबाटै कामलाई व्यवस्थित पारेको नेता खानको भनाई छ ।

यस्तै जिल्लाको पश्चिमी क्षेत्रमा रहेको शिवराज नगर कमिटीले पनि चन्द्रौटामा कार्यालय खोलेको छ । चैत्र २२ गते पार्टी अध्यक्ष नेपालले कार्यालयको औपचारिक उद्घाटन गर्नुभएको नगर अध्यक्ष सरोज पौडेलले जानकारी दिनुभयो । जिल्ला मै समाजवादीको प्रभाव क्षेत्र मानिएको शिवराजमा पार्टी कार्यालय स्थापना पश्चात सत्ता गठबन्धन दलहरुको बैठक पनि सोही कार्यालयमा बस्न सफल भएको छ ।
बजारको मुख्य क्षेत्रमा रहेको कार्यालयमा दैनिक चहलपहल बढ्न थालेको अध्यक्ष पौडेलले जनाउनुभयो ।

यसैगरि भारतीय सीमावर्ती कृष्णनगरमा पनि नगर कमिटीले पार्टी कार्यालय स्थापना गरेको छ । नगर अध्यक्ष इन्तेखाव अहमद खाँले कृष्णनगर बजारमा एकीकृत समाजवादीको नगर कार्यालय सञ्चालनमा ल्याइएको बताउनुभयो । पार्टी केन्द्रीय सदस्य दोय क्षेत्र बहादुर खत्री र मीना परियारले उक्त कार्यालयको उद्घाटन गर्नुभएको हो । कृष्णनगरमा बहालवाला वडाध्यक्षसमेत एकीकृत समाजवादीमा आएका छन् । उपमेयरसहित सबै वडामा चुनाव लड्ने तयारीमा रहेको समाजवादी यहाँ बलियो हुँदै गएको छ ।