प्युठानमा बेहुली लिएर फर्किँदै गरेको जीप दुर्घटना, ६ जनाको मृत्यु, सात जना गम्भीर घाइते

दाङ ।
प्युठानमा बेहुली लिएर फर्किँदै गरेको जीप दुर्घटना हुँदा ६ जनाको घटनास्थलमै ज्यान गएको छ । सात जना गम्भीर घाइते भएका छन् ।

नौबहिनी गाउँपालिकाको लुङबाट बेहुली लिएर गौमुखी गाउँपालिकाको लिवाङ जाँदै गरेको जीप आज बिहान १ बजे ओखरपाटामा दुर्घटना भएको जिल्ला प्रहरी कार्यालय प्युठानले जानकारी दिएको छ ।

ग १ ज ५०९२ नम्बरको जीप दुर्घटनामा परेको हो । घाइतेहरूलाई उपचारका लागि जिल्ला अस्पताल बिजुवार लगिएको जिल्ला प्रहरी कार्यालय प्युठानका प्रमुख सत्यनारायण थापाले बताउनुभयो ।

जीप सडकबाट ३ सय मिटर तल खोल्सामा खसेको प्रहरीले जनाएको छ। दुर्घटनाबारे थप विवरण आउन बाँकी रहेको थापाले बताउनुभयो ।