पियरीसँग बार्सिलोनाले गर्‍यो ३ वर्षको सम्झौता

काठमाडौं ।
स्पेनिस क्लब बार्सिलोनाले स्ट्राइकर पियरी एम्रिक अबुमियाङसँग ३ वर्षको सम्झौता गरेको छ। बार्सिलोनाले बुधबार उनीसँग २०२५ सम्मको लागि सम्झौता गरेको हो।

३२ वर्षीय इंग्लिस प्रिमियर लिग क्लब आर्सनलका स्टार पियरीलाई बार्सिलोनाले जनवरी सरुवा बजारको अन्तिम दिन सोमबार अनुबन्ध गरेको थियो।

डिसेम्बरमा अनुशासनको कारबाहीमा परेपछि मैदान बाहिर रहँदा आएका उनीबाट आर्सनलले कप्तानीको जिम्मेवारीसमेत खोसेको थियो।

आर्सनलबाट पियरीले प्रिमियर लिगको १ सय २८ खेलमा ६८ गोल गरेका छन्। उनलाई भित्र्याउने होडमा इटालियन सिरी ‘ए’ को क्लब युभेन्टस पनि थियोे।

बार्सिलोनाले पियरीको रिलिज क्लज सय मिलियन युरो राखेको छ। उनी ला लिगामा दर्ता भएसँगै आइतबार हुने एट्लेटिको मड्रिडविरुद्धको खेलमा डेब्यू गर्न सक्ने छन्।