मायादेवी अनलाइन, चारनम्बर । कपिलवस्तुबाट संचालित मायादेवी अनलाइन डट कमका प्रधान सम्पादक चन्द्रकान्त न्यौपाने ‘स्वयम् सेवा राष्ट्रिय बहुमुखी प्रतिभा पुरस्कार २०७८’ बाट सम्मानित हुनुभएको छ ।
केन्द्रीय कार्यालय काठमाण्डौँमा रहेको नेपाल स्वयम् सेवक संघले कपिलवस्तुको बाणगंगा नगरपालिकामा आफ्नो पहिलो साधारण सभा सम्पन्न गर्ने क्रममा न्यौपानेलाई सो राष्ट्रियस्तरको पुरस्कार प्रदान गरेको हो । कार्यक्रमका विशिष्ट अतिथि जिल्ला समन्वय समिति कपिलवस्तुका प्रमुख नारायण प्रसाद खनाल र अध्यक्ष शर्माले पुरस्कार प्रदान गर्नुभएको थियो ।
पत्रकारितासंगै न्यौपानले आफ्नो बहुप्रतिभाबाट सामाजिक र मानवीय कार्य गरेर मुलुकलाई योगदान दिएको भन्दै संस्थाले सम्मान गरेको अध्यक्ष खेमराज शर्माले कार्यक्रममा बताउनु भयो । स्वयम् सेवक संघका हरेक काममा मायादेवीकर्मी न्यौपानेले निशुल्क योगदान दिनुभएको भन्दै आगामी दिनमा पनि सहकार्यको अपेक्षासहित पुरस्कार दिइएको प्रष्ट्याउनु भयो ।
एक दशक बढी पत्रकारितामा सक्रिय न्यौपाने अहिले सामुदायिक रेडियो मायादेवी कपिलवस्तुका स्टेसन म्यानेजर पनि हुनुहुन्छ । राम्रो काम गर्नेहरुलाई प्रोत्साहन प्रदान गर्न संस्थाले यस खालको पुरस्कार दिने प्रणालीको सुरुवात गरेको अध्यक्ष शर्माले बताउनु भयो । आगामी दिनमा पनि स्वयम् सेवी भावनाले काम गर्ने यस्ता प्रतिभाहरुलाई संस्थाले सम्मान गर्ने उहाँको भनाई छ ।
यसैगरी संस्थाले अर्को राष्ट्रिय पुरस्कारबाट मानव सेवा आश्रमलाई विभुषित गरेको छ । आश्रमलाई ‘स्वयम् सेवा मानव सेवा राष्ट्रिय सम्मान २०७८’ दिइएको हो । आश्रमले मानव सेवाबाट मुलुकलाई ठुलो गुन लगाएकोले सम्मान गरिएको जनाइएको छ । आश्रमकी लुम्बिनी प्रदेश प्रमुख सरु अधिकारीले पुरस्कार ग्रहण गर्नुभएको थियो ।
प्रतिक्रिया