नेकपा (एकीकृत समाजवादी) कपिलवस्तुको जिल्ला भेला भोलि, तयारी पूरा

मायादेवी अनलाइन, वाणगंगा ।
नेकपा (एकीकृत समाजवादी) कपिलवस्तुको जिल्ला स्तरीय भेलाको तयारी पूरा भएको छ । जिल्लाको शिवराज नगरपालिकाको खरेन्द्रपुरस्थित देउराली रिसोर्टमा विहीबार (भोलि) दिउँसो १२ बजे आयोजना गरिएको जिल्ला स्तरीय भेलाको तयारी पूरा भएको पार्टीको प्रचार विभागले जनाएको छ ।

जिल्लाभरका अगुवा कार्यकर्तालाई सहभागीता गराइने भेलाको सम्बोधन गर्न पार्टीका सचिव तथा लुम्बिनी प्रदेश इन्चार्ज भागवत विश्वासी, पोलिटव्यूरो सदस्य तथा लुम्बिनी प्रदेश कमिटी अध्यक्ष मेटमणी चौधरी, केन्द्रीय सदस्यहरु लंका बहादुर हमाल, मीना परियार, केन्द्रीय निर्वाचन आयोगका सदस्य अहमद अब्दुल रउफ आउने जनाइएको छ ।

तत्कालिन एमालेबाट विद्रोह गरी गठन भएको एकीकृत समाजवादी कपिलवस्तुले जिल्लामा पार्टी विस्तारलाई तीव्र पारिरहेको छ । जिल्लाका ६ पालिका, झण्डै ३० वडामा वडा कमिटी गठन गरिसकेको समाजवादीले महत्वपूर्ण जनवर्गीय संगठन पनि निर्माण गरेको छ ।

विहीबारको भेलामा पार्टीको आगामी कार्ययोजना, नीति, विचार र सिद्धान्तको बारेमा प्रशिक्षात्मक मन्तव्य हुने पार्टीका जिल्ला अध्यक्ष लंका बहादुर हमालले जानकारी दिनुभयो ।