कपिलवस्तुमा देउसी-भैली खेल्न पाइने, भर्नुपर्ने छ यस्तो प्रहरी फारम !

चन्द्रकान्त न्यौपाने, चारनम्बर ।

कपिलवस्तुमा यस बर्ष देउसी भैली खेल्न पाइने भएको छ । जिल्ला सुरक्षा समितिले बनाएको विविध शर्तसहितको फारम भरेर मात्र जिल्लामा देउसी भैली खेल्न पाइने भएको हो ।

तिहारको बेला हुन सक्ने सम्भावित क्षति र दुर्घटना न्यूनिकरणको लागि सुरक्षा समितिले तोकेको फारम देउसी भैली खेल्ने समुह या संस्थाले भर्नु पर्ने बाध्यकारी नियम बनाएको प्रहरी प्रमुख उपरिक्षक दान बहादुर कार्कीले मायादेवी अनलाइनलाई जानकारी दिनुभयो । उहाँका अनुसार विहान ७ बजेदेखि राति ८ बजेसम्मको देउसी–भैली खेल्ने समयसिमा तोकिएको छ ।

उक्त फारम नभरीकन अनुमति विना मनोमानी ढंगले देउसी भैली खेलेको पाइए नियन्त्रणमा लिएर कानुन बमोजिक कारबाही गरिने कार्कीले बताउनु भयो । प्रमुख कार्कीले तिहारको नाममा विनास्विकृति पैसा असुल्ने धन्दालाई पनि निरुत्साहित गर्न र अरु दुर्घटना कम गर्न यस फारमले सहयोग गर्ने विश्वास ब्यक्त गर्नुभयो । देउसी–भैली फारम र शर्तको बारेमा स्थानीय सरकारका प्रतिनिधिलाई पनि जानकारी गराइसकिएको सुरक्षा समितिले जनाएको छ ।

फारममा केके भर्नुपर्छ ?

• देउसी भैली कार्यक्रमको आयोजकको नाम र ठेगाना
• कार्यक्रम संयोजकको नाम र फोटो
• सहभागि संख्या (महिला –पुरुष)
• कार्यक्रम संचालन हुने एरिया र स्थान
• देउसी–भैली कार्यक्रम सुरु हुने र बन्द हुने मिति
• सुरु हुने समय (स्पटमा)
• समाप्त हुने समय

शर्तनामाहरु

• भैली खेल्ने क्रममा कोरोनाको जोखिमलाई ख्याल गर्दै स्वास्थ्य मापदण्ड अपनाउनु पर्ने
• कमभन्दा कम मानिस सहभागि गराउनु पर्ने
• मदिरा सेवन तथा आतिशबाजी (पटका) प्रयोग गर्न नपाइने
• स्थानीय प्रशासनले तय गरेको मापदण्ड पुरा गर्नु पर्ने
• देउसी भैलीमा प्रयोग हुने सवारी बाहेक अरु निजी मोटरसाइकल, कार जिप प्रयोग गर्न नपाइने
• रंग अविर जथाभावी प्रयोग गर्न नपाइने
• अर्को ब्यक्तिलाई असर गर्ने गरी साउण्ड सिस्टम र डिजे प्रयोग गर्न नपाइन

सवारी साधन प्रयोग भएको भए

• सवारी साधनको प्रकार
• सवारी नम्बर
• सवारी धनीको नाम र ठेगाना
• सवारी चालक अनुमति पत्र र सम्पर्क नम्बर