कपिलवस्तुमा यो हप्ता मात्रै कोरोनाबाट ७ जनाको मृत्यु, मृतकको संख्या पुग्यो ३७

मायादेवी अनलाइन, चारनम्बर ।
कपिलवस्तुमा कोरोना संक्रमणबाट ज्यान जानेको संख्या ३७ पुगेको छ । बाणगंगा र बुद्धभूमि नगरपालिकामा मंगलबार मात्र २ जनाको मृत्यु भए संगै जिल्लामा मृत्यु हुनेको संख्या ३७ पुगेको हो ।
बाणगंगामा मंगलबार ज्यान गुमाउने पुरुष ४८ बर्षका थिए ।

उनी नेपाली कांग्रेसका केन्द्रीय सदस्य तथा प्रतिनिधिसभा सदस्य अतहर कमालका भाइ हुन् । कोरोना माहामारीको दोस्रो लहर फैलिएसंगै कपिलवस्तुमा एक सातामा ज्यान जानेको संख्या ७ पुगेको प्रमुख जिल्ला अधिकारी चक्रपाणी पाण्डेले जानकारी दिनुभयो ।

उहाँका अनुसार संक्रमितको संख्या १ सय ९२ पुगेको छ । कपिलवस्तुका भारतका विभिन्न ठाउँमा कोरोना संक्रमितको संख्या बढ्दै गएपछि रोजगारीका लागि पुगेकाहरु नेपाल फर्कने क्रमसँगै संक्रमितको संख्या बढेको स्वास्थ्यका अधिकारी बताउँछन् ।

सक्रिय संक्रमितको जिल्लाका विभिन्न स्वास्थ्य संस्थाका साथै बुटवलमा उपचार भैरहेको जनाइएको छ । कोरोनाको पहिलो लहरमा जिल्लामा ३० जनाको ज्यान गएको थियो ।