स्रोत नखुलेको २५ लाख बढी रकमसहित दुई भारतीय पक्राउ

वीरगञ्ज ।
बारामा स्रोत नखुलेको २५ लाख ३५ हजार रुपैयाँसहित दुई भारतीय नागरिक पक्राउ परेका छन्। मोटरसाइकलमा रहेका दुईजनालाई रकमसहित पक्राउ गरिएको प्रहरीले जनाएको छ।

पक्राउ पर्नेमा मोटरसाइकल चालक भारत बिहारको पूर्वी चम्पारण ग्राम पञ्चायत–७ नरकटियाका ३५ वर्षे चन्द्रशेखर प्रसाद र मोटरसाइकलमा पछाडी सवार ३८ वर्षका संजय कुमार रहेको बारा प्रहरीले जानकारी दिएको छ ।

कलैया उपमहानगरपालिका–८ बरेवा स्थित कलैया–मटिअर्वा सडकखण्डमा प्रहरीले बीआर ०५ के ०७९८ नम्बरको भारतीय मोटरसाइकललाई रोकेर जाँच गर्ने क्रममा उक्त रकम बरामद गरिएको प्रहरी निरीक्षक सुरेन्द्र यादवले जानकारी दिए ।

प्रहरीले स्रोत नखुलेको एक हजार दरको १७ सय ७२ थान र ५ सयको दरका १५ सय २६ थान नोट फेला पारेको हो । स्रोत नखुलेको रकमसहित पक्राउ परेका दुवैजनालाई प्रहरी हिरासतमा राखी थप अनुसन्धान भइरहेको जिल्ला प्रहरी कार्यालय बाराले जनाएको छ ।