सिरि ए फुटबलः एसी मिलानको अप्रत्यासित जित

एजेन्सी ।
थियो हर्नान्डेजले ९३ औँ मिनेटमा गरेको गोलमा सिरि ए फुटबलमा एसी मिलानले लाजियोमाथि अप्रत्यासित नतिजा निकालेको छ ।

बुधबार राति भएको खेलमा नाटकीय जितसंगै एसी मिलानले लाजियोलाई ३–२ गोल अन्तरले हरायो । जितसंगै मिलान क्लबले सिरि ए फुटबलमा आफ्नो अग्रतालाई कायमै राखेको छ ।

एन्टन रेबिले हेडमार्फत मिलान क्लबलाई अग्रता दिलाएका थिए । हकन कल्हानोग्लुले पेनाल्टीमा गोल गर्दै १७औँ मिनेटमा अग्रतालाई दोब्बर बनाए । दोस्रो हाफमा लगातार दुई गोल गर्दै लाजियो खेलमा फर्कियो । लुईस अल्बर्टो र सिरो ईमोबिलले पेनाल्टीमा गोल गर्दै लाजियोलाई बराबरीमा ल्याएका थिए । तर, हर्नान्डेजले हेडमार्फत गोल गर्दै मिलानलाई जित दिलाए ।

जितसंगै एसी मिलानले इन्टरसँग एक अंकको अग्रता लिन सफल भएको छ । एसी मिलानले बराबरी खेलेको अवस्थामा इन्टरले शीर्ष स्थान कब्जा गर्ने समीकरण थियो ।