स्रोत नखुलेको १६ लाख रकमसहित कपिलवस्तुमा एकजना पक्राउ

मायादेवी अनलाइन, तौलिहवा ।
कपिलवस्तुमा स्रोत नखुलेको १६ लाख नेपाली रुपैयाँसहित एक जना सशस्त्र प्रहरीको नियन्त्रणमा परेका छन् ।

जिल्लाको मायादेवी गाउँपालिका वडा नं. १ पकडीका ३६ बर्षीय विनोद सोनारलाई १६ लाख रुपैयाँसहित नियन्त्रणमा लिइएको सशस्त्र प्रहरी निरिक्षक सन्तोष देवकोटाले बताउनुभयो ।

भारतबाट नेपाल आउँदै गरेका उनी बिशेष सुराकीका आधारमा मायादेवी गाउँपालिका वडा नं. ४ ठकुरापुर गोब्ली बगैंचाबाट सशस्त्र प्रहरीको नियन्त्रणमा परेका हुन् ।

स्रोतका अनुसार नेपाल प्रहरीले घटनाको बारेमा थाहा पाएपछि सशस्त्र प्रहरीको सहयोग मागेको थियो । सीमा नाकामा रेखदेखको जिम्मा सशस्त्रले लिएकोले प्रहरीले यो घटनाबारे जानकारी दिए पछि दुवै सुरक्षा निकायको नियन्त्रणमा सोनार आएको जनाइएको छ ।

पक्राउ परेका सोनारको साथबाट १ हजार दरका एक एक सय थानका १२ गड्डी र ५ सय दरका एक एक सय थानका ८ गड्डी बरामद गरिएको जनाइएको छ ।

पक्राउ परेका सोनार र १६ लाख रुपैयाँ सुठौली भन्सार कार्यालयमा बुझाइएको प्रहरी निरिक्षक देवकोटाले बताउनुभयो ।

सुनको अवैध कारोवार गर्दै आएका उनले नेपाल तर्फबाट सुन भारत तर्फ तस्करी गर्नका लागि सो रकम ओसारपोसार हुँदै गरेको हुन सक्ने आशंका गरिएको छ ।