७ केजी अफिमसहित चारजना पक्राउ

दाङ ।
दाङमा प्रहरीले ७ किलो लागुऔषध अफिमसहित ४ जनालाई पक्राउ गरेको छ । विशेष सूचनाका आधारमा देउखुरीको राप्ती गाउँपालिका १ भालुवाङमा रहेको दक्षिणकाली सोल्टी होटेलबाट उनीहरुलाई साउन ८ गते बेलुकी साढे ५ बजे पक्राउ गरिएको प्रहरीले आज सार्वजनिक गरेको हो ।

जिल्ला प्रहरी कार्यालय दाङका प्रहरी प्रमुख गणेश चन्दका अनुसार पक्राउ परेकाहरुको साथबाट ६ किलो ९६७ ग्राम अवैध लागुऔषध अफिम नियन्त्रणमा लिइएको छ ।

पक्राउ पर्नेमा रोल्पा जिल्ला सुनछहरी गाउँपालिका वडा नं। ५ निवासी ३५ वर्षीय दुजबहादुर रोका, सुनछहरी गाउँपालिका–२ निवासी ३२ वर्षीय लालमन घर्तिमगर, सोही ठाउँ निवासी ३२ वर्षीय हर्कबहादुर घर्तिमगर र सोही ठाउँ निवासी २२ वर्षीय लालसिंह विक छन् ।

प्रहरीले लागुऔषध अफिमसहित उनीहरुको साथबाट लु १ च ६१७१ नम्वरको बलेरो जिप,लु ४० प ९८०६ नम्वरको २२० सिसिको पल्सर मोटरसाइकल र विभिन्न कम्पनीका ५ थान मोवाइलसमेत नियन्त्रणमा लिएको जिल्ला प्रहरी कार्यालय दाङले जनाएको छ ।