‘ग्रेलिस ठूलो क्लबमा जानेछन्’

एजेन्सी ।
कोरोनाका कारण विश्व खेलकुदजगत सुनसान भए पनि खेलाडीहरूको अनुबन्धको चर्चा भने चलिरहेको हुन्छ । जसले गर्दा खेलाडीहरूको एकदेखि अर्को क्लबसँग जोडेर मिडियाहरूले चर्चा गरेका हुन्छन् ।

त्यस्तै प्रिमियर लिग क्लब एस्टोन भिल्लाका खेलाडी ज्याक ग्रेलिस पनि पछिल्लो समय अनुबन्धनको चर्चामा छन् । उनी सन् २०१३ मा एस्टोन भिल्लाबाट लोनमा नोट्स कन्ट्रीमा गएका थिए ।

ग्रेलिसलाई पछिल्लो समय प्रिमियर लिग क्लब म्यान्चेस्टर युनाइटेडले अनुबन्ध गर्ने चर्चा चलिरहेको छ । उनको युनाइटेडसँगको चर्चालाई जोडेर कोनोर होरिहानेले ग्रेलिस कुनै ठूलो क्लबमा जाने तर त्यसका लागि अझै केही समय कुर्नुपर्ने बताए ।

“उनी उत्कृष्ट लेभलका खेलाडी हुन् । उनको खेल्ने तरिका एकदमै उत्कृष्ट र फरक तरिकाको छ । मैले उनीसँग खेल्न पाउँदा उनको खेल प्रदर्शनलाई नजिकबाट नियाल्ने अवसर पाएको थिएँ । अब उनी ठूलो क्लबमा जाने पर्खाइमा छन् तर त्यसका लागि केही समय कुर्नुपर्छ,” दी साउथेन स्टार स्पोर्टस् पोड कास्टसँगको कुराकानीमा उनले भने ।

ग्रेलिसले हाल नोट्स कन्ट्रीका लागि ३७ लिग खेल खेलेर पाँच गोल गरेका छन् । उनले एस्टोन भिल्लाका लागि भने १४९ लिग खेल खेल्दै २२ गोल गरेका छन् ।