सल्यानमा बस दुर्घटनाः दाङका सहचालकको मृत्यु, तीन घाइते

सल्यान ।
सल्यानको मार्केबजार नजिकै बस दुर्घटनामा एकजनाको मृत्यु भएको छ । उक्त दुर्घटनामा तीनजना घाइते भएको छन् । मृत्यु हुनेमा दाङको तुलसीपुर उपमहानगरपालिका–४ का १८ वर्षीय बसका सहचालक सुजन नेपाली रहेको जिल्ला प्रहरी कार्यालय सल्यानले जनाएको छ। उनको नेपालगञ्ज मेडिकल कलेज कोहलपुरमा उपचारको क्रममा मृत्यु भएको हो ।

शारदा नगरपालिका–८ काटीगाउँबाट दुलधरापोखरा जाँदै गरेको ना ३ ख ७९७५नम्बरको बिहीबार राति बस मार्केबजार नजिकै दुर्घटना भएको थियो । दुर्घटनामा शारदा–८ का २६ वर्षीय सुरेन्द्र सेजवाल, २८ वर्षीय थमन चलाउने र वडा नम्बर ५ का २७ वर्षीय खेमराज बुढाथोकी घाइते भएका छन् ।

उनीहरुको जिल्ला अस्पताल सल्यानमा उपचार भइरहेको र अवस्था सामान्य रहेको प्रहरीले बताएको छ। बसको टायर पन्चर भएपछि ममर्तका लागि दुलधारा पोखरा आउँदै गर्दा दुर्घटना भएको प्रहरीले बताएको छ ।