नगर प्रमुख श्रेष्ठद्धारा डोरीतान खेलाडीको विदाई

मायादेवी अनलाइन, बुद्धभूमि ।
प्रदेश नं. १ को सुनसरीमा आयोजित डोरीतान च्याम्पियनसिप प्रतियोगितामा सहभागी खेलाडीलाई विदाई गरिएको छ । प्रदेश ५ बाट प्रतिनिधित्व गरी सुनसरी हिडेका खेलाडीलाई बुद्धभूमि नगरपालिकाका नगर प्रमुख केशव कुमार श्रेष्ठले विहीबार विहान विदाई गर्नुभएको हो ।
दोस्रो अन्तर्राष्ट्रिय मनमोहन डोरीतान गोल्डकप च्याम्पियनसिप प्रतियोगिता यही फाल्गुण २२ गतेदेखि २४ गतेसम्म सुनसरीको दुहवीमा सञ्चालन हुँदै छ । खेल र खेलाडी प्रति विभिन्न सहयोग गर्दै आएको बुद्धभूमिले यो प्रतियोगीतामा जाने खेलाडी, अफिसिय टिमका सदस्यलाई आवश्यक सहयोग गरी त्यहाँ पठाएको हो । टोलीमा १५ जना भन्दा बढी संलग्न छन् ।
डोरीतान खेल धेरैले नसुने पनि भारत लगायतका देशमा प्रख्यात छ । प्रदेश नं. ५ को प्रतिनिधित्व गर्दै बुद्धभूमि नगरपालिका भित्र र आसपासका खेलाडीसहित सुनसरी प्रस्थान गरिएको वडा नं. ४ का वडाध्यक्ष पवनकुमार थारुले जानकारी दिनुभयो । खेलाडीले प्रतियोगीतामा उपाधि जित्ने आफुहरुको अपेक्षा रहेको पनि उहाँले सुनाउनुभयो ।
विदाई कार्यक्रममा बोल्दै नगर प्रमुख श्रेष्ठले डोरीतान खेलका खेलाडीका लागि नगरले आवश्यक सहयोग गर्ने प्रतिवद्धता जनाउनुभएको छ । चालु आवमा पनि केही बजेट छुट्याएको भन्दै आगामी दिनमा आवश्यक बजेट छुट्टाउने बताउनुभयो । प्रतियोगीता खेलाडीले उपाधि जितेर सिंगो ५ नं. प्रदेशको नाम राख्नेमा आफु विश्वस्त रहेको उहाँले बताउनुभयो । विदाई कार्यक्रममा नगरपालिकाका प्रशासकीय अधिकृत राजन पोख्रेल लगायतको उपस्थिती रहेको थियो ।