भारतमा पुग्यो कोरोना भाइरस संक्रमितको संख्या २८

एजेन्सी ।
कोरोना भाइरस विश्वब्यापी बन्दै गइरहेको अवस्थामा छिमेकी मुलुक भारतमा पनि कोरोना भाइरस संक्रमितको संख्या २८ पुगेको छ ।

बुधबार मात्रै भारत भ्रमणमा रहेका १६ इटालियन पर्यटकमा कोरोना संक्रमण देखिएसँगै एकै दिन दोब्बर भन्दा बढीको संख्यामा कोरोना संक्रमिर फेला परेको हो । सोमबार राजस्थानमा एक इटालियन पर्यटकमा कोरोना भाइरस पुष्टि भएको थियो ।

भारतमा इटालियन पर्यटक बाहेक युरोपबाट फर्केका एक ४५ वर्षीय पुरुष, दुबईबाट फर्केका एक २४ वर्षीय युवक र दिल्लीका एक संक्रमितको सम्पर्कमा आएका अन्य ६ मा कोरोना संक्रमण देखिएको जनाइएको छ ।

त्यस्तै इटालियन पर्यटकहरुलाई डुलाएका एक भारतीय चालकमा पनि भाइरसको पुष्टि भएको जनाइएको छ । भारतमा भेटिएका कुल २८ संक्रमित मध्ये केरलाका ३ जना भने निको भइसकेको दाबी गरिएको छ ।

कोरोना भाइरसको संक्रमण फैलिन सक्ने आंशकामा भारतले सिटामोल लगायत अन्य २५ प्रकारका औषधि र कच्चा पदार्थ निर्यातमा रोक लगाएको छ ।

हालसम्म भारतका एअरपोर्टहरुमा ५ लाख ८९ हजार तथा भारत नेपालको बोर्डरमा १० लाख जनाको स्क्रीनिङ गरिएको पनि भारतीय सञ्चारमाध्यमहरुले जनाएका छन् ।