नेइमार र एम्बाप्पे चम्किंमा पिएसजीको सानदार जित 

एजेन्सी । 

स्टार खेलाडीहरु केलियन एमबाप्पे, नेयमार र मोउरो इकार्डीको प्रभावशाली प्रदर्शनमा फ्रेन्च लिग वानमा पेरिस सेन्ट जर्मेन (पीएसजी) ले सानदार जित निकालेको छ । पीएसजीले शनिबार राति घरेलु मैदानमा भएको खेलमा एमेइन्सलाई ४–१ को फराकिलो गोल अन्तरले पराजित गरेको हो । पीएसजीको जितमा एमबाप्पेले दुई तथा नेयमार र इकार्डीले सानज एक गोल गरे । एमेइन्सका स्टेभिन मेन्डोजाले सान्त्वना गोल फर्काए ।

पार्क दि प्रिन्सेस पेरिसमा खेलको १०औं मिनेटमा नेयमारको पासमा एमबाप्पेले गोल गर्दै पीएसजीलाई पहिलो हाफमा १–० को अग्रता दिलाएको थियो । ४७औं मिनेटमा इकार्डीको पासमा नेयमारले गोल गर्दै पीएसजीको अग्रता दोब्बर पारे ।६५औं मिनेटमा एमबाप्पेले एन्जल डि मारियाको पासमा गोल गर्दै पीएसजीलाई फराकिलो जिततर्फ अग्रसर गराए । ७०औं मिनेटमा स्टिभिनले गोल गर्दै खेललाई ३–१ को अन्तरमा ल्याएका थिए । ८४औं मिनेटमा इकार्डीले गोल गर्दै पीएसजीलाई ४–१ को फराकिलो जित दिलाए ।

जितसँगै पीएसजीले शीर्षस्थानमा थप पकड बनाएको छ । पीएसजीको १८ खेलबाट ४५ अंक पुगेको छ । जुन एक खेल बढी खेलेको मार्सेलीको भन्दा ७ अंक बढी हो । एमेइन्स १७ अंकसहित १८औं स्थानमा छ ।