एसिड आक्रमणमा परेकी युवतीलाई उपचारका लागि काठमाडौं पठाइयो, एक जना पक्राउ

वीरगन्ज ।
एसिड आक्रमणबाट घाइते भएकी किशोरीलाई उपचारका लागि काठमाडौं पठाइएको छ । शुक्रबार बिहान ६ बजे वीरगन्जको गणेशमान चोकमा एसिड आक्रमण भएकी किशोरीलाई थप उपचारका लागि काठमाडौंको किर्तीपुर अस्पतालमा थप उपचारका लागि पठाइएको हो ।
शुक्रबार बिहान ६ बजेतिर वीरगन्जको गणेशमान चोकमा १५ वर्षीया मुस्कान खातुनमाथि एसिड आक्रमण भएको थियो । स्थानीय त्रिभुवन माविमा कक्षा ९ मा अध्ययनरत खातुनमाथि २ जना युवकले एसिड आक्रमण गरेका थिए ।
एसिड आक्रमणमा संलग्नमध्ये १ जनालाई प्रहरीले पक्राउ गरेको छ । पक्राउ पर्नेमा वीरगन्ज महानगरपालिका–२ छपकैया घर भएका सम्साद आलम छन् । एसिड आक्रमणका मुख्य अभियुक्त १६ वर्षीय माजिद आलम भने फरार छन् । प्रहरीले उनको खोजी भइरहेको जनाएको छ ।
एसिड आक्रमण गरेको आरोपमा पक्राउ परेका युवा

एसिड आक्रमणबाट खातुनको अनुहार, छाती र दाहिने हात पोलिएको जनाइएको छ । गम्भीर घाइते भएकी खातुनको स्थानीय अस्पतालमा उपचार सम्भव नभएपछि काठमाडौं पठाइएको वीरगन्ज महानगरपालिकाका मेयर विजय कुमार सरावगीले जानकारी दिए ।
मेयर सरावगीसहित पहलमा खातुनलाई उपचारका लागि काठमाडौं पठाइएको हो । मेयर सरावगीले खातुनको उपचारका लागि तत्कालका लागि आफूले खर्च व्यहोर्ने र आवश्यक पर्ने थप खर्चको व्यवस्था गर्ने प्रयास भइरहेको पनि बताए ।