बर्दियामा बाघले दुई जनाको ज्यान लियो

बर्दिया ।
बर्दियामा बाघको आक्रमणमा परी दुईजनाको मृत्यु भएको छ । बिहीबार गेरुवा गाउँपालिकामा एकजना र आइतबार बिहान ठाकुरबाबा नगरपालिकास्थित भुरीगाउँमा थप एकजना गरी दुईजनाको बाघको आक्रमणमा परी मृत्यु भएको प्रहरीले जनाएको छ ।

आइतबार बिहान बाघको आक्रमणमा परी मृत्यु हुनेमा ७० वर्षीय पहरीया थारु रहेका छन् । बंगुरलाई दाना खुवाउन जाने क्रममा बाघले आक्रमण गर्दा उनको मुत्यु भएको हो ।

यसअघि गत बिहीबार पाटे बाघले आक्रमण गर्दा गेरुवा गाउँपालिका वार्ड नम्बर ४ दंगपुरकी ५६ वर्षीया रामकली शाहीको मृत्यु भएको थियो । बाघले आक्रमण गर्ने क्रम बढेसँगै स्थानीय त्रसित बनेका छन् ।