मुलुकभर ८६ प्रतिशत धान रोपाइँ, प्रदेश ५ मा कति ?

काठमाडौं । 

साउनको तेसा्रे साता आइपुग्दा मुलुकभर ८६ प्रतिशत धान रोपाइँ सम्पन्न भएको छ । कृषि तथा पशुपन्छी विकास मन्त्रालयले दिएको जानकारी अनुसार गतवर्ष यही अवधिमा ८९ प्रतिशत रोपाइँ सम्पन्न भएको थियो ।

साउन १८ गतेसम्ममा सुदूरपश्चिम प्रदेशमा सबैभन्दा धेरै ९५.३३ प्रतिशत रोपाइँ सम्पन्न भएको छ । त्यसैगरी १ नम्बर प्रदेशमा ८०.१३ प्रतिशत, २ नम्बर प्रदेशमा ८१.१९ प्रतिशत, ३ नम्बर प्रदेशमा ८८.६७ प्रतिशत, गण्डकी प्रदेशमा ८६.५९ प्रतिशत, ५ नम्बर प्रदेशमा ८८.८६ प्रतिशत र कर्णाली प्रदेशमा ९४.१० प्रतिशत रोपाइँ सम्पन्न भएको छ ।

त्यसैगरी भौगोलिक अवस्थाअनुसार उच्च पहाडमा ८८.८४ प्रतिशत, मध्य पहाडमा ८६.६५ प्रतिशत र तराइमा ८५.६३ प्रतिशत रोपाइँ सम्पन्न भएको छ । नेपालमा कुल १३ लाख ७१ हजार ७ सय ६ हेक्टर क्षेत्रफलमा धान खेती हुँदै आएको छ ।

जसमध्ये हालसम्ममा कुल ११  लाख ७९ हजार ६ सय ८८ हेक्टर क्षेत्रफलमा रोपाइँ सम्पन्न भएको छ । १ लाख ९२ हजार १८ हेक्टर क्षेत्रफलमा अझै रोपाइँ हुन बाँकी छ । गत वर्ष यहि अवधिमा भने १२ लाख २९ हजार ३ सय ३५ हेक्टर क्षेत्रफलमा रोपाइँ सम्पन्न भएको थियो । गत वर्षभन्दा यो वर्ष ४९ हजार ६ सय ४७ हेक्टर क्षेत्रफलमा कम रोपाइँ भएको छ ।

मन्त्रालयको अनुसार कुल रोपाइँ भएको ८६ प्रतिशतमध्ये ११ वटा जिल्लामा सतप्रतिशत रोपाइँ सम्पन्न भएको छ । काठमाडौं, भक्तपुर, ललितपुर, रोल्पा, रुकुम पूर्व, प्युठान, जुम्ला, कालिकोट, मुगु, डोल्पा र हुम्लामा सतप्रतिशत रोपाइँ सम्पन्न भएको हो ।