अमेरिका–मेक्सिको सीमामा बाबु छोरीको हृदयविदारक शव फेला

मेक्सिको सिटी ।
अमेरिका र मेक्सिकोको सीमामा रहेको रियो ग्राण्डे नदिमा २ वर्षे बालिका र उनका बाबुको शव निकै हृदयविदारक अवस्थामा फेला पारिएको तस्बीर अहिले सामाजिक सञ्जालमा भाइरल भइरहेको छ ।
गैर कानूनी रुपमा मेक्सिकोबाट अमेरिका प्रवेश गर्न खोज्ने एल साल्भाडोरका नागरिक र उनकी छोरीलाई रियो ग्राण्डे नदिमा मृत फेला पारिएको हो । तस्बीरमा बालिका आफ्ना बाबुको टिसर्टमा बाँधिएकी छिन् भने उनको हातले आफ्ना बाबुको गलामा अँगालो हालेको देखिएको छ ।
मृतक साल्भाडोरन नागरिक ओस्कर अल्बेर्टो मार्टिनेज रहेको र उनकी छोरी एङ्गी भलेरा रहेको साल्भाडोरन अधिकारीले पुष्टि गरेका छन् ।
उनीहरुको शव अमेरिकी राज्य टेक्ससको ब्राउन्सभिल शहर पारी मेक्सिको तर्फ मातामोरोस क्षेत्रको रियो ग्राण्डे नदीमा फेला परेको थियो ।
उनीहरुलाई आइतबार रियो ग्राण्डे नदीले बगाएको बताइएको छ । उनीहरुको शव पछि नदीको किनारमा फेला पारिएको थियो । उनीहरुको शवनजिकै मानिसहरुले फालेका फोहार जम्मा भएका थिए ।
पछिल्लो समय अमेरिकामा कठोर आप्रवासन नीति अख्तियार गरिएपनि अवैध रुपमा अमेरिका प्रवेश गर्न चाहने आप्रवासीको सङ्ख्या कम भएको छैन । सोही अनुसार आप्रवासीहरु कठिन बाटो प्रयोग गरी अमेरिका प्रवेश गर्न बाध्य हुँदै गएका छन् ।