महिला विश्वकप फुटबलः नेदरल्याण्डस र इटाली अन्तिम ८ मा

एजेन्सी ।
नेदरल्याण्डस महिला विश्वकप फुटबलको क्वाटरफाइनलमा प्रवेश गरेको छ । फ्रान्समा जारी प्रतियोगिता अन्तर्गत अन्तिम १६ को खेलमा मंगलबार राति जापानलाई २–१ ले पराजित गरेर नेदरल्याण्डसले अन्तिम ८ मा स्थान पक्का गरेको हो । नेदरल्याण्डसको जितमा दुवै गोल लिक मार्टेन्सले गरेकी हुन् । जापानका लागि युइ हसेगवाले एक गोल फर्काइन् ।
१७ औँ मिनेटमा मार्टेन्सको गोलबाट नेदरल्याण्डसले सुरुवाति अग्रता लियो । ४३ औँ मिनेटमा हरेगवाले जापानका लागि गोल फर्काएपछि खेलमा १–१ को बराबरी भयो ।
अतिरिक्त समयमा धकेलिने देखिएको खेलमा ९० औँ मिनेटमा नेदरल्याण्डसले पेनाल्टी पायो । मार्टेन्सले त्यसलाई सदुपयोग गरेर नेदरल्याण्डसका लागि विजयी गोल गरिन् । जापान अन्तिम १६ बाटै घर फर्किन बाध्य भयो ।
मंगलबार राति नै भएको अर्को खेलमा जित निकालेको इटाली पनि अन्तिम ८ मा पुगेको छ । इटालीले चीनलाई २–० ले हराएर क्वाटरफाइनलमा स्थान बनाएको हो ।