सलिना बस दुर्घटना अपडेटः एक जनाको मृत्यु, घाइतेहरुको नामावली सहित

मायादेवी अनलाइन, वाणगंगा ।
कपिलवस्तुको तौलिहवाबाट काठमाडौंका लागि छुटेको बस दुर्घटना हुँदा एक जनाको मृत्यु भएको छ । सलिना यातायातको बस दुर्घटनामा बुटवल उपमहागरपालिका वडा नं.- ११  देवीनगरकी माया श्रेष्ठको उपचारको क्रममा निधन भएको हो । मृतक ५० बर्षिय श्रेष्ठ अर्घाखाँचीको छत्रदेव गाउपालिका स्थायी ठेगाना भई हाल बुटवल उपमहानगरपालिका वडा नम्वर ११ बस्दै आउनु भएको थियो ।  दुर्घटनामा बस चालक शिव ढकाल गम्भिर घाइते छन् भने अर्का एक जनाको परिचय खुल्न नसकेको इलाका प्रहरी कार्यालय सालझण्डीले जनाएको छ । बस दुर्घटनामा दर्जन बढी घाइते भएका छन् । घाइते हुनेहरुमा कपिलवस्तु नगरपालिका वडा नं. ११ प्रदीप चौधरी, सोही ठाउँका लक्ष्मी नारायण चौधरी, सैनामैना ६ की राजकुमारी थारु, शुद्धोधन ४ की पुष्पा चौधरी घाइते, वाणगंगा -३ की बुद्ध कुमारी कुँवर, कपिलवस्तु न.पा.- ११ का अशिसकर आलम, सोही नपा- १२ का रामसेवक, रुपन्देही तिलोत्तमा ४ का पदम बहादुर थापा रहेको इलाका प्रहरी कार्यालय सालझण्डीले मायादेवी अनलाइनलाई जानकारी दिएको छ ।घाइते सबैको मर्सिसिटी अस्पताल बुटवलमा उपचार भैरहेको प्रहरीको भनाई छ ।आइतबार साँझ रुपन्देहीको सैनामैना नगरपालिका सालझण्डीमा बस दुर्घटनामा परेको हो । बाटो चिप्लो हुँदा लु २ ख ८३९ नं. को बस दुर्घटनामा परेको हुन सक्ने प्रहरीको प्रारिम्भक अनुमान छ । बस सडकबाट ५ मिटर दक्षिण दिशातर्फ पल्टिएको छ ।