उपाधि होडमा टोटनह्यामलाई गम्भीर धक्का

एजेन्सी ।
उपाधि होडमा रहेको टोटनह्यामलाई गम्भीर धक्का लागेको छ । इंग्लिस प्रिमियर लिग फुटबल अन्तर्गत शनिबार राति भएको खेलमा माउरिसिओ पोकेटिनोको टिम टोटनह्याम बर्नलीसँग पराजित भयो ।

अवे मैदानमा भएको खेलमा टोटनह्याम बर्नलीसँग २–१ ले निराश बनेको हो । ह्यारी केन चोटमुक्त भएर मैदान फर्किएको खेलमा टिम पराजित भयो ।

यो खेलमा टोटनह्यामका प्रशिक्षक पोकेटिनो रेफ्री माइक डिनसँग आक्रोशमा आए । रेफ्रीका धेरै निर्णयमा सहमत नभएका पोकेटिनो माइकले बर्नलीलाई कर्नर दिए र त्यसमा गोल गर्दै बर्नलीले ५७ औँ मिनेटमा अग्रता लियो ।

यो निर्णयमा पोकेटिनो रेफ्रीसँग आक्रोशमा प्रस्तुत भए । खेलपछि पोकेटिनोले आफूले सीमा नाघेको र रेफ्री माइकसँग माफी माग्न सक्ने बताएका छन् ।

५७ औँ मिनेटमा बर्नलीका लागि क्रिस वुडले गोल गरे । ६५ औँ मिनेटमा केनले टोटनह्यामका लागि बराबरी गोल फर्काए । तर ८३ औँ मिनेटमा एशली बार्नसले गोल गरे र टिमलाई २–१ को जित दिलाए ।

टोटनह्यामको उपाधि होडमा गम्भीर धक्का लाग्यो । हारपछि तेस्रो स्थानको टोटनह्यामको २७ खेलबाट ६० अंक छ । २६ खेलबाट ६५ अंक रहेको लिभरपुल दोस्रो स्थानमा छ भने शीर्षस्थानको म्यानचेस्टर सिटीको २७ खेलबाट ६५ अंक नै रहेको छ ।

शनिबार राति भएका अरु खेलमा न्युक्यासलले हडर्ल्सफिल्ड टाउनलाई २–० तथा क्रिष्टल प्यालेसले लेस्टर सिटीलाई ४–१ ले हरायो । यस्तै बोर्नमाउथ र वुल्भ्सले १–१ को बराबरी खेलेका छन् ।