छुट्टाछुट्टै सवारी दुर्घटनामा तीनजना घाइते

मायादेवी अनलाइन, चन्द्रौटा ।
कपिलवस्तुमा छुट्टाछुट्टै भएको सवारी दुर्घटनामा परी दुई जना घाइते भएका छन् । जिल्लाको शिवराज नगरपालिका १ चोरखोलामा पूर्वबाट पश्चिमतर्फ जाँदै गरेको ना ७ ख ५७१२ नम्बरको ट्रकले विपरीत दिशातर्फ आउँदै गरेको लु११ प ४५८० नम्बरको मोटरसाइकललाई ठक्कर दिंदा मोटरसाइकल चालक घाइते भएको प्रहरीले जनाएको छ ।
घाइते हुनेमा शिवराज नगरपालिका ४ का २७ वर्षे नूर सेख रहेका छन् । सेखको घुँडा, खुट्टा र दुवै हातमा गहिरो चोट लागेको वडा प्रहरी कार्यालय चन्द्रौटाका प्रहरी निरीक्षक झविन्द्रप्रसाद भट्टराईले जानकारी दिएका छन् । घाइते सेखलाई चन्द्रौटस्थित नेशनल मेडिकलमा उपचार भइरहेको प्रहरीले जनाएको छ । ठक्कर दिने ट्रक र चालकलाई प्रहरीले नियन्त्रणमा लिएको छ ।
यसैबीच जिल्लाको मायादेवी गाउँपालिका २, अभिरावस्थित चाकरचौडा–पकडी सडकखण्डमा सवारी दुर्घटनामा परी दुई जना घाइते भएका छन् ।
घाइते हुनेमा मायादेव गाउँपालिका २ बस्ने ३२ वर्षे गुड्डु यादव रहेका छन् । चाकरचौडाबाट पकडीतर्फ जाँदै गरेको यूपी ५५ आर ३३३१ नम्बरको मोटरसाइकल र विपरीत दिशाबाट जाँदै गरेको यूपी ५५ एस ०२१८ नम्बरको मोटरसाइकल एक आपसमा ठक्कर खाँदा ०२१८ नम्बरका चालक यादव घाइते भएका हुन् । त्यसैगरी दुर्घटनाबाट ३३३१ नम्बरका मोटरसाइकलको पछाडि सवार लुम्बिनी सांस्कृतिक गाउँपालिका ५, रुपन्देही बस्ने ४० वर्षे ममिना खातुन घाइते भएकी छन् । घाइते दुबैको स्थानीय सेफा अस्पताल पकडीमा सामान्य उपचारपछि थप उपचारको लागि भैरहवा पठाइएको जिल्ला प्रहरी कार्यालय कपिलवस्तुले जनाएको छ ।