दुई भारतीय नागरिक गाँजा सहित पक्राउ

चितवन, २६ पुस ।
भरतपुरबाट ठूलो परिमाणमा गाँजा बरामद गरिएको छ । गाँजा ओसार पसारमा संलग्न दुई भारतीय नागरिकसमेत पक्राउ गरिएको जिल्ला प्रहरी उपरीक्षक दीपक थापाले जानकारी दिनुभयो ।
मंगलबार प्रहरी सहायक निरीक्षक अक्षयकुमार साहको नेतृत्वमा खटिएको प्रहरी टोलीले भरतपुर महानगरपालिका वडा नम्बर ९ गोन्द्राङमा गाडीभित्र जाँच गर्दा ८६ किलो ४७० ग्राम गाँजा बरामद गरेको हो ।
चितवनबाट वीरगञ्जहुँदै भारत जान लागेको जेएच ०१ एन ८६११ नम्बरको बोलेरोमा जाँच गर्दा हुटमुनि फल्सबटम बनाइ पत्रिका र प्लास्टिकले बेरी टेपले बाँधेर बण्डल बनाएर राखिएको डेढ किलोदेखि सवा तीन किलोसम्म तौल भएको ३३ बण्डल गाँजा फेला पारेको थियो ।
प्रहरीले गाँजा ओसारपसारमा प्रयोग भएको गाडी बरामद गर्नुका साथै त्यस कार्यमा संलग्न भारत मोतीहारी जिल्ला गोपीगञ्जका २४ वर्षीय नरेशकुमार प्रसाद र सोही ठाउँका १९ वर्षीय निकेशकुमारलाई नियनत्रणमा लिइएको छ ।
गाँजा ओसारपसारबारे थप अनुसन्धान भइरहेको प्रहरीले जनाएको छ । यता चितवन प्रहरीले चितवनको पहाडी क्षेत्रमा १५ बिगाहामा लगाइएको गाँजा खेती फाँडेर नष्ट गरेको छ । रासस